ಹಿರಿಯೂರು :
ತಾಲ್ಲೂಕು ತೀವ್ರ ಬರಗಾಲ ಎದುರುಸುತ್ತಿದ್ದು, ಹಿಂದೆ ಇದೇ ಸಮಯದಲ್ಲಿ ವಾಣಿವಿಲಾಸ ಜಲಾಶಯದಲ್ಲಿ 132 ಅಡಿ ನೀರು ಸಂಗ್ರವಾಗಿತ್ತು, ಈಗ 122 ಅಡಿ ಇದೆ, ಒಂದೇ ವರ್ಷಕ್ಕೆ 10 ಅಡಿ ನೀರು ಖಾಲಿಯಾಗಿದೆ, ಮುಂದಿನ ವರ್ಷ ಈ ಸಮಯಕ್ಕೆ ನೂರರ ಒಳಗೆ ಬರುತ್ತದೆ ಹೀಗೆ ಮುಂದುವರೆದರೆ ನಮ್ಮ ಅಡಿಕೆ ತೆಂಗು, ಸೇರಿದಂತೆ ಎಲ್ಲಾ ಬೆಳೆಗಳು ಸಂಪೂರ್ಣ ಹಾಳಾಗುತ್ತದೆ ಎಂಬುದಾಗಿ ರೈತಸಂಘದ ತಾಲ್ಲೂಕು ಅಧ್ಯಕ್ಷರಾದ ಕೆ.ಟಿ.ತಿಪ್ಪೇಸ್ವಾಮಿ ಹೇಳಿದರು.
ತಾಲ್ಲೂಕು ರೈತ ಸಂಘದ ವತಿಯಿಂದ ಕರೆಯಲಾಗಿದ್ದ ಮಾಸಿಕ ಸಭೆ ನಡೆಸಿ, ಸಭೆಯ ನಂತರ ತಾಲ್ಲೂಕು ತಹಶೀಲ್ದಾರರ ಮೂಲಕ ಸರ್ಕಾರಕ್ಕೆ ಮನವಿ ಪತ್ರ ಸಲ್ಲಿಸಿ, ಅವರು ಮಾತನಾಡಿದರು.
ತುಂಗಾದಿಂದ ಭದ್ರಾ, ಭದ್ರಾದಿಂದ ವಾಣಿವಿಲಾಸ ಜಲಾಶಯಕ್ಕೆ ನೀರು ಹರಿಸುವ ಕಾಮಗಾರಿಯನ್ನು ತ್ವರಿತವಾಗಿ ಮುಗಿಸಲು ಒತ್ತಾಯಿಸಿ ತುಂಗಾದಿಂದ ಭದ್ರಾದವರೆಗೆ ಪಾದಯಾತ್ರೆಯನ್ನು ಮುಂದಿನ ತಿಂಗಳಲ್ಲಿ ಹಮ್ಮಿಕೊಳ್ಳಲಾಗಿದ್ದು, ಈ ಕಾರ್ಯಕ್ರಮಕ್ಕೆ ನಮ್ಮ ತಾಲೂಕಿನಿಂದ ಸುಮಾರು 50 ಬಸ್ಸುಗಳ ಮೂಲಕ ಜನರು ಹೋರಾಟಕ್ಕೆ ಹೊರಡಲು ತೀರ್ಮಾನಿಸಲಾಗಿದೆ ಎಂದರಲ್ಲದೆ,

ಸುಮಾರು 94 ದಿನ ರೈತರ ಹೋರಾಟದ ಫಲವಾಗಿ ಜೆಜೆ ಹಳ್ಳಿ ಹೋಬಳಿಯ ಎಲ್ಲಾ ರೈತರ ಜಮೀನುಗಳಿಗೆ ಪೈಪ್ ಲೈನ್ ಮೂಲಕ ಡ್ರಿಪ್ಸ್ ಕಮ್ ತುಂತುರು ನೀರಾವರಿ ಅಳವಡಿಸಲು ಸರ್ಕಾರ ಮುಂದಾಗಿದೆ ಆದರೆ ಬೆಸ್ಕಾಂ ಇಲಾಖೆಯಿಂದ ಅಕ್ರಮ ಸಕ್ರಮ ಯೋಜನೆ ನಾಲ್ಕು ವರ್ಷವಾದರೂ ರೈತರಿಗೆ ಪರಿವರ್ತಕಗಳನ್ನು ಕೊಡಲಿಲ್ಲ,ಅಧಿಕಾರಿಗಳು ನಿರ್ಲಕ್ಷೆಯಿಂದ ಗುಣಮಟ್ಟ ವಿದ್ಯುತ್ ಸರಬರಾಜು ಆಗುತ್ತಿಲ್ಲ, ಸರ್ಕಾರ ಸಮರ್ಪಕ ವಿದ್ಯುತ್ ಸರಬರಾಜು ಮಾಡಬೇಕೆಂದು ಒತ್ತಾಯಿಸಿದರು.
ಈ ಬಗ್ಗೆ ಸರ್ಕಾರ ಸೂಕ್ತ ನಿರ್ಧಾರ ಕೈಗೊಳ್ಳದಿದ್ದರೆ, ಸಾವಿರಾರು ರೈತರೊಂದಿಗೆ ರಾಷ್ಟ್ರೀಯ ಹೆದ್ದಾರಿ ಬಂದ್ ಮಾಡಲಾಗುವುದು, ಚಳುವಳಿಯನ್ನು ರೂಪಿಸಲಾಗುವುದು, ಬರಗಾಲ ಘೋಷಣೆಯಾಗಿ ಎರಡು ತಿಂಗಳು ಕಳೆದರೂ ಇದುವರೆಗೂ ರೈತರಿಗೆ ಬೆಳೆ ವಿಮೆ, ಬೆಳೆ ಪರಿಹಾರ ಮತ್ತು ಜಾನುವಾರುಗಳಿಗೆ ಕುಡಿಯುವ ನೀರು ಹಾಗೂ ಮತ್ತು ಮೇವು ಒದಗಿಸಲು ತಾಲೂಕು ಆಡಳಿತ ಮುಂದಾಗಬೇಕು ಎಂದರಲ್ಲದೆ,
ಕೃಷಿ ಇಲಾಖೆಯಿಂದ ಕಳೆದ ವರ್ಷ ಸ್ಪಿಂಕ್ಲರ್ ಪೈಪಿಗೆ ಒಂದು ಸೆಟ್ ಒಬ್ಬ ರೈತರಿಗೆ 1746 ರೂ ಇತ್ತು, ಈ ವರ್ಷ 4139 ರೂ ಸರ್ಕಾರ ನಿಗದಿ ಮಾಡಿದೆ, ಕೂಡಲೇ ಸರ್ಕಾರ ಬರಗಾಲ ಇರುವುದರಿಂದ ಈಗ ಇರುವ ದರವನ್ನು ಕಡಿಮೆ ಮಾಡಬೇಕು. ಮುಂದಿನ ದಿನಗಳಲ್ಲಿ ಗ್ರಾಮಘಟಕಗಳನ್ನು ಪುನಃಚೇತನಗೊಳಿಸಿ ಸರ್ಕಾರದಿಂದ ಸವಲತ್ತುಗಳನ್ನು ಪಡೆಯಲು ಗಟ್ಟಿಯಾದ ಹೋರಾಟವನ್ನು ಹಮ್ಮಿಕೊಳ್ಳಬೇಕಾಗುತ್ತದೆ ಎಂಬುದಾಗಿ ಹೇಳಿದರು.
ಈ ಸಂದರ್ಭದಲ್ಲಿ ರೈತಮುಖಂಡರಾದ ಆಲೂರುಸಿದ್ದರಾಮಣ್ಣ, ತಿಮ್ಮಾರೆಡ್ಡಿ, ರಂಗಸ್ವಾಮಿ, ಶಿವಣ್ಣ, ವಿರುಪಾಕ್ಷ, ಬಿ.ಆರ್.ರಂಗಸ್ವಾಮಿ, ಅರಳೀಕೆರೆ ತಿಪ್ಪೇಸ್ವಾಮಿ, ಮಾಂತೇಶ್, ದೇವೇಂದ್ರಪ್ಪ, ಜಗನ್ನಾಥ್, ರಾಜಪ್ಪ ಜಯಣ್ಣ, ಜಗದೀಶ್, ಹನುಮಂತರಾಯಪ್ಪ, ನಾಗರಾಜ್ ಇತರರು ಭಾಗವಹಿಸಿದ್ದರು.