ಹಿರಿಯೂರು:
ದಕ್ಷಿಣಕಾಶಿ ಖ್ಯಾತಿಯ ಹಿರಿಯೂರಿನ ಮೂಲ ಸೌಕರ್ಯ ಅಭಿವೃದ್ಧಿಗೆ ವೇಗವನ್ನು ನೀಡುವ ಉದ್ದೇಶದಿಂದ ಸ್ಮಾರ್ಟ್ ಸಿಟಿ ಸ್ಪರ್ಷ ನೀಡಲಾಗುವುದು ಎಂಬುದಾಗಿ ಜಿಲ್ಲಾ ಉಸ್ತುವಾರಿ ಸಚಿವರಾದ ಡಿ ಸುಧಾಕರ್ ಹೇಳಿದರು.
ನಗರದ ಗೋಪಿ ಬಡಾವಣೆಯಲ್ಲಿ ವಿವಿಧ ಅಭಿವೃದ್ಧಿ ಕಾಮಗಾರಿಗೆ ಸೋಮವಾರ ಪೂಜೆ ನೆರವೇರಿಸಿ ಅವರು ಮಾತನಾಡಿದರು.
ಸ್ವಚ್ಛ ಸುಂದರ ನಗರವನ್ನಾಗಿಸಲು ಜನರ ಸುರಕ್ಷತೆ, ಶುದ್ಧ ಕುಡಿವ ನೀರು, ವಾರ್ಡ್ ಗಳ ಅಭಿವೃದ್ಧಿ, ನಗರದಲ್ಲಿ ಹಾದು ಹೋಗಿರುವ ವಿವಿ ಸಾಗರ ಎಡ-ಬಲ ದಂಡೆ ನಾಲೆಗಳ ಸ್ವಚ್ಛತೆ, ತಡೆಗೋಡೆ ನಿರ್ಮಾಣ, ವೇದಾವತಿ ನದಿಶುದ್ಧೀಕರಣ, ವಸತಿ ಯೋಜನೆ ಸೇರಿದಂತೆ,
ಯುಜಿಡಿ, ತ್ಯಾಜ್ಯನೀರು ಸಂಸ್ಕರಣೆ, ಜನಸ್ನೇಹಿ ಆಡಳಿತ, ಗುಣಮಟ್ಟದ ಆರೋಗ್ಯಸೇವೆ, ಶಿಕ್ಷಣ, ರಸ್ತೆ, ವಿಸ್ತರಣೆ, ಉದ್ಯಾನವನಗಳ ಪುನಶ್ಚೇತನ ಸೇರಿ ಅಗತ್ಯ ಮೂಲಸೌಕರ್ಯಗಳ ಅಭಿವೃದ್ಧಿಗೆ ವಿಶೇಷ ಅನುದಾನ ನೀಡಲಾಗುವುದು ಎಂಬುದಾಗಿ ಅವರು ಹೇಳಿದರು.
ನಗರದಲ್ಲಿ ವಾಸಮಾಡುವವರ ಜೀವನಮಟ್ಟ ಸುಧಾರಿಸಲು ವಿಶೇಷ ಯೋಜನೆ ರೂಪಿಸಲಾಗಿದೆ. ನಗರದ ಸರ್ವಾಂಗೀಣ ಅಭಿವೃದ್ಧಿಗೆ ಜನರ ಸಹಕಾರ ತುಂಬಾ ಅಗತ್ಯ ಎಂದರಲ್ಲದೆ,
ತಾಲ್ಲೂಕಿನ ಜನತೆಗೆ ಗುಣಮಟ್ಟದ ಆರೋಗ್ಯ ಸೇವೆ ಒದಗಿಸಲು 25 ಕೋಟಿ ರೂ. ವೆಚ್ಚದ ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆ, ಬಿಇಒ ಕಚೇರಿ, ತಾ.ಪಂ. ಕಟ್ಟಡ, ನಗರಸಭೆ, ಸಾರಿಗೆ ಡಿಪೋ ಇತರ ಅಭಿವೃದ್ಧಿಗೆ ಕಾಮಗಾರಿಗಳು ತಾಲ್ಲೂಕಿನ ಪ್ರಗತಿಗೆ ವರದಾನವಾಗಲಿವೆ ಎಂಬುದಾಗಿ ಅವರು ಹೇಳಿದರು.
ಈ ಸಂದರ್ಭದಲ್ಲಿ ನಗರಸಭೆ ಸದಸ್ಯರಾದ ಮಮತಾ, ಈರಲಿಂಗೇಗೌಡ, ಟಿ. ಚಂದ್ರಶೇಖರ್, ರವಿಚಂದ್ರ ನಾಯ್ಕ್, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಖಾದಿ ಜೆ. ರಮೇಶ್, ಉದ್ಯಮಿ ನರೇಂದ್ರಬಾಬು, ಮುಖಂಡರುಗಳಾದ ಮಹೇಶ್, ನಾಗೇಂದ್ರನಾಯ್ಕ್, ಉಮಾದೇವಿ, ಮಂಜುಳಾ, ಗಾಯಿತ್ರಿ, ಸುಜಾತ, ವರ್ಷಿಣಿ, ಹನುಮಂತರಾಯಪ್ಪ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.