ಚಳ್ಳಕೆರೆ ಜು.19ಡೆಂಘಿ ಜಾಗೃತಿ
ಆರೋಗ್ಯ ಇಲಾಖೆ ಮತ್ತು ನಗರಸಭೆ ಚಳ್ಳಕೆರೆ ಇವರ ಸಹಭಾಗಿತ್ವದಲ್ಲಿ ಸ್ಪೆಷಲ್ ಲಾರ್ವ ಸಮೀಕ್ಷೆಯನ್ನು ಚಳ್ಳಕೆರೆ ನಗರದಲ್ಲಿ ಹಮ್ಮಿಕೊಳ್ಳಲಾಯಿತು ಈ ಸರ್ವೆಯಲ್ಲಿ 150 ಜನ ಆಶಾ ಕಾರ್ಯಕರ್ತೆಯರು 30 ಜನ ಮೇಲ್ವಿಚಾರಕರು ಭಾಗವಹಿಸಿದ್ದರು ಈ ಕಾರ್ಯಕ್ರಮದ ಚಾಲನೆಯನ್ನು ತಾಲೂಕು ಆರೋಗ್ಯ ಅಧಿಕಾರಿಗಳ ಕಚೇರಿಯ ಕ್ಷೇತ್ರ ಆರೋಗ್ಯ ಶಿಕ್ಷಣಾಧಿಕಾರಿಗಳಾದ ತಿಪ್ಪೇಸ್ವಾಮಿ ಆರೋಗ್ಯ ನಿರೀಕ್ಷಣಾಧಿಕಾರಿಗಳಾದ ಗಣೇಶ್ ನಗರಸಭೆ ಮತ್ತು ಸಾರ್ವಜನಿಕ ಆಸ್ಪತ್ರೆಯ ಮಂಜುಳಮ್ಮ ರವರು ಚಾಲನೆ ನೀಡಿದರು ಕಾರ್ಯಕ್ರಮದಲ್ಲಿ ಆಶಾ ಕಾರ್ಯಕರ್ತರು ಮನೆಮನೆ ಭೇಟಿ ನೀಡಿ ಲಾರ್ವ ಸಮೀಕ್ಷೆ ಮಾಡುತ್ತಾರೆ ಹಾಗೂ ಈ ಕೆಳಕಂಡ ಆರೋಗ್ಯ ಶಿಕ್ಷಣವನ್ನು ನೀಡುತ್ತಾರೆ
ಡೆಂಘಿ ಮಾರಣಾಂತಿಕ ಖಾಯಿಲೆಯಾಗಿದ್ದು, ಪರಿಪೂರ್ಣ ಚಿಕಿತ್ಸೆ ಸದ್ಯಕ್ಕೆ ಲಭ್ಯವಿಲ್ಲ. ಇದನ್ನು ಹರಡದಂತೆ ತಡೆಗಟ್ಟುವುದು, ಬಾರದಂತೆ ದೇಹದ ರೋಗ ನಿರೋಧಕ ಶಕ್ತಿಯನ್ನು ಹೆಚ್ಚಿಸಿಕೊಳ್ಳುವುದು ಈಗ ಇರುವ ಸೂಕ್ತ ಮಾರ್ಗಗಳಾಗಿವೆ.

ಡೆಂಘಿ ಈಡೀಸ್ ಸೊಳ್ಳೆಯಿಂದ ಹರಡುತ್ತದೆ. ಇದು ಹಗಲಿನ ವೇಳೆ ಮನುಷ್ಯನಿಗೆ ಕಚ್ಚಿ ಡೆಂಘಿಯನ್ನು ಹರಡುತ್ತದೆ. ಈ ಸೊಳ್ಳೆಗಳ ಉತ್ಪತ್ತಿ ಸ್ಥಾನ ನಿಂತ ನೀರು, ಮನೆಯ ಸುತ್ತಮುತ್ತ ನೀರು ನಿಲ್ಲದಂತೆ, ಹಳೆಯ ಟೈರು, ತೆಂಗಿನಸಿಪ್ಪೆ, ತೆರೆದ ತೊಟ್ಟಿ ಇತ್ಯಾದಿಗಳಲ್ಲಿ ನೀರು ನಿಲ್ಲದಂತೆ ನೋಡಿಕೊಳ್ಳಿ. ಮನೆಯಲ್ಲಿ ನೀರು ಸಂಗ್ರಹಿಸುವುದಾದರೆ ಮುಚ್ಚಿದ ಪಾತ್ರೆಗಳಲ್ಲಿ ನೀರನ್ನು ಸಂಗ್ರಹಿಸಿ. ಪೂರ್ತಿ ದೇಹ ಮುಚ್ಚುವಂತೆ ತುಂಬುತೋಳಿನ ಬಟ್ಟೆಗಳನ್ನು ಧರಿಸಿ. ಹಗಲಿನಲ್ಲಿ ಮಲಗುವುದಾದರೆ ಸೊಳ್ಳೆ ಪರದೆಗಳನ್ನು ಬಳಸಿ. ಕಿಟಕಿಗಳಿಗೆ ಸೊಳ್ಳೆ ಬಾರದಂತೆ ಜಾಲರಿಗಳನ್ನು ಅಳವಡಿಸಿ.

ಡೆಂಘಿ ಲಕ್ಷಣಗಳಾದ ತೀವ್ರ ಜ್ವರ, ತಲೆನೋವು, ಮೈಕೈ ನೋವು, ವಾಂತಿ, ದೇಹದಲ್ಲಿ ರಕ್ತ ಹೆಪ್ಪುಗಟ್ಟಿದ ಕಲೆಗಳು, ಸುಸ್ತು ಕಂಡುಬಂದರೆ ತಕ್ಷಣ ಹತ್ತಿರದ ವೈದ್ಯರನ್ನು ಸಂಪರ್ಕಿಸಿ.

ಮನೆಯ ಒಳಗಡೆ ಸೊಳ್ಳೆ ಇರದಂತೆ ಲವಂಗ, ಕರ್ಪೂರ, ಬೆಳ್ಳುಳ್ಳಿ ಸಿಪ್ಪೆ, ಬೇವಿನಸೊಪ್ಪು ಇವುಗಳನ್ನು ಬಳಸಿ ಪ್ರತಿದಿನ ಮುಂಜಾನೆ ಮತ್ತು ಸಂಜೆ ಎರಡು ಬಾರಿ ಧೂಪವನ್ನು ಹಾಕಿ.

ಮನೆಯ ಒಳಗಡೆ ಹೊಂಗೆ ಎಣ್ಣೆ, ಸಾಸಿವೆ ಎಣ್ಣೆ ದೀಪ ಹಚ್ಚಿಡಿ. ಈ ಕ್ರಮಗಳು ಮನೆ ಒಳಗಡೆ ಸೊಳ್ಳೆಗಳು ಇರದಂತೆ ತಡೆಗಟ್ಟುತ್ತವೆ.

ಮನೆಯ ಸುತ್ತಮುತ್ತ ಕೈತೋಟದಲ್ಲಿ ಸೊಳ್ಳೆಗಳನ್ನು ವಿಕರ್ಷಿಸುವ ಚಂಡು ಹೂವು, ಪುದೀನಾ, ನಾಗದಾಳಿ, ದವನ, ತುಳಸಿ, ಕಾಮಕಸ್ತೂರಿ ಗಿಡಗಳನ್ನು ಬೆಳಸಿ.

ಖಾಯಿಲೆ ಯಾವುದೇ ಇರಲಿ, ರೋಗಾಣು ಯಾವುದೇ ಇರಲಿ ರೋಗ ಬರದಂತೆ ತಡೆಯುವ ರೋಗನಿರೋಧಕ ಶಕ್ತಿಯನ್ನು ಉತ್ತಮ ಆಹಾರ, ವಿಹಾರ, ಜೀವನ ಶೈಲಿ, ಯೋಗ, ಧ್ಯಾನ, ಪ್ರಾಣಾಯಾಮ ಇವುಗಳನ್ನು ರೂಡಿಸಿಕೊಂಡು ಹೆಚ್ಚಿಸಿಕೊಳ್ಳಿ